بیوناس دیاز

افسانہ نگاری ۔۔۔۔۔۔۔۔۔۔ایک ادبی نشست

چھبیسواں افسانہ ------------ بیوناس دیاز 

از -- مجید اختر

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

میں اس سے ٹکراتے ٹکراتے بچا ۔ ہوا یوں کہ فری وے پر ٹریفک زیادہ ہونے کی وجہ سے مجھے دفتر پہنچنے میں دیر ہوگئی تھی ۔ میں اپنی دھن میں شیشے کے دروازے کھول کر تیزی سے آگے بڑھا اور عین اسی لمحہ میری نظر اس پر پڑی ۔ وہ بھی تیزی سے دفتر میں داخل ہونے کی کوشش میں تھی ۔ میں نے بڑی مشکل سے اپنے آپ کو سنبھالا ورنہ ہم دونوں کی بہت شدید ٹکر ہوجاتی اور شرمندگی جو ہوتی سو الگ ۔ میں نے کھسیائے ہوئے لہجہ میں ایکسکیوز می کہا اور دروازہ اس کے لئے تھام کر ایک طرف ہوگیا ۔ بجائے ناراض ہونے کے اس نے چمکتی ہوئی آنکھوں سے میری طرف دیکھا اور ہولے سے کہا ۔۔۔ بیوناس دیاز ۔۔ اور ہلکی سی مسکراہٹ ہونٹوں پر سجائے آگے بڑھ گئی ۔ میں اپنی ہڑبڑاہٹ میں اسے معقول جواب بھی نہ دے سکا ۔ کچھ دیر کے بعد جب میں گرم گرم مہکتی ہوئی کافی کا مگ تھامے اپنے کیوبیکل میں جاکر اطمینان سے بیٹھا تو مجھے صبح کے واقعہ کو یاد کرکے بڑی مسرت سی ہوئی ۔ امریکہ میں عموماً لوگ گُڈ مارننگ ہی کہتے ہیں، جیسے ہمارے ہاں صبح بخیر ۔۔۔۔۔۔ ہسپانوی زبان مین دن بخیر کہا جاتا ہے ۔ یعنی ۔۔بیوناس دیاز ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب مجھے خیال آیا کہ اچھی خاصی خوش مزاج اور حسین خاتون تھی اور پھر ہمارے ہی دفتر میں تھی ۔ صبح کی ڈاک دیکھنے اور کچھ اہم کاموں کو نمٹانے کے بعد میں ریسیپشن کی جانب چلا آیا اور مختلف ڈپارٹمنٹ کے MARY MACIAS لوگوں کے نام اور فون اکسٹینشنز کی لسٹ دیکھنے لگا ۔
نام تھا اس کا ۔ میں اسے میری مکیاس ہی پڑھتا اور سمجھتا رہا ۔ امریکہ کی تمام تر آبادی مہاجروں پر مشتمل ہے جو پہلے پہل یورپ اور میکسیکو سے اور پھر ساری دنیا کے مختلف ممالک سے آکر یہاں بس گئے ہیں ۔ لہٰذہ یہاں آپ کو عجیب عجیب ناموں سے سابقہ پڑتا ہے ۔ مہذب قوم ہے اس لئے ایک طریقہ لوگوں نے اپنا رکھا ہے کہ آپ کا نام کہیں پڑھ کر( عموماً بزنس کارڈ پر) آپ کو پکارنے سے پہلے آپ سے پوچھ لیتے ہیں کہ آپ کے نام اور فیملی کے نام کا صحیح تلفظ کیا ہے ۔ جب آپ صحیح تلفظ بتادیں تو پھر وہ کوشش کرتے ہیں کہ آپ کو آپ کے صحیح نام سے پکارا جائے ۔ پھر بھی ہمارے مشرقی، افریقی یا روسی ناموں کو صحیح تلفظ سے پکارنا ان کی مخصوص لہجے میں منڈھی زبانوں کیلئے بے حد مشکل ہوتا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں نے ایک بار موقع تلاش کرکے اس سے پوچھ ہی لیا کہ وہ اپنے خاندانی نام کا تلفظ کیسے کرتی ہے ۔ پتہ چلا کہ نام ہے میری مسیاز ۔ ۔ ۔ ۔واہ کیا نام ہے اور کیا موسیقیت ہے ۔ مکیاس سے تو جانے کیوں قینچی کا یا پھر جیومیٹری کا خیال آتا ہے ۔ مکیاس سے مجھے مقراض یاد آئی ۔ لڑکپن میں پان والے کی دوکان پر کارٹن سے پھاڑے گئے مُڑے تُڑے گتّے کے ٹکڑے پر ہاتھ سے لکھا ہوتا تھا ۔۔۔قرض مقراض محبت است ۔ ۔ ۔کتنے اچھے دن تھے وہ۔ ۔ ۔ ۔ پان والا بھی بساط بھر فارسی لکھ لیا کرتا تھا اور ادھار کے خواہشمند پان اور سگرٹ کے خریداروں کو بھی فارسی ہی میں تنبیہہ بھی ہوجاتی تھی ۔ اب تو حال یہ ہے کہ پان والا تو کجا، ریڈیو اور ٹیلی وژن جیسے اداروں میں بھی فارسی تو خیر دور کی بات، صحیح تلفظ سے اردو بولنے اور لکھنے والے بھی خال خال ہی نظر آتے ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس تو یوں ہوا کہ میری مکیاس کی جگہ میری مسیاز مجھے کہیں زیادہ اچھا لگا، جیسے کسی بدیسی پھول کا نام ہو ۔ اس کا پورا وجود ہی ایک خوبصورت بدیسی پھول کا سا تھا ۔ ہم ایک ہی دفتر میں کام کرتے تھے ۔ میں سیلز میں تھا اور وہ بزنس آفس میں ۔ پھر یوں ہوا کہ بیوناس دیاز ہی ہماری قدرِمشترک بھی بن گیا اور ہماری دوستی کی بنیاد بھی ۔ صبح جب بھی اس سے سامنا ہوتا وہ اپنی چمکتی ہوئی آنکھوں سے مجھے دیکھ کر مسکرا دیتی اور اپنے مخصوص انداز سے کہتی ۔۔۔بیوناس دیاز ۔ ۔ 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دن بھر میں کئی کئی بار کہیں نہ کہیں آمنا سامنا ہو ہی جاتا ۔ اسے بھی خوب اندازہ تھا کہ میں اس کی ٹوہ میں رہتا ہوں ۔ عورت چاہے کُرّہٗ ارض کے کسی بھی علاقے کی ہو ۔ قدرت نے اسے بہت ہی پاور فل انٹینا سے نوازا ہوتا ہے ۔ اسے پتہ رہتا ہے کہ کون کہاں سے اسے دیکھ رہا ہے ۔ وہ بیک وقت چاروں طرف دیکھ سکتی ہے ۔ چاہے وہ ساحلِ سمندر کی سفید ریت پر نیم عریاں آنکھیں بند کئے دنیا و مافیہا سے نے خبر اوندھی پڑی ہو، چاہے وہ ہمارے کسی دیہات کے شادی منڈپ میں پھولوں اور سہیلیوں سے گھری لمبا سا گھونگھٹ کاڑھے بیٹھی ہو ۔ چاہے وہ موٹے موٹے چشمے لگائے، سفید یونی فارم میں اپنے حسن کو چھپائے آپ کی گود میں بیٹھے بچے کا ٹمپریچر لے رہی ہو یا کسی بنک کے کاوٗنٹر پر ایک اندازِ بے رخی سے لوگوں کے چیک کیش کر رہی ہو۔ ۔ ۔ ۔اس کا اینٹینا ہمہ وقت آن رہتا ہے ۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپ نے مشاھدہ کیا ہوگا کہ مرد عموماً مولویوں، صوفیوں، پادریوں ، پنڈتوں اور اس قماش کے افراد سے فی الفور متاثر ہوجاتے ہیں ۔ لیکن عورت ظاہری حُلیہ یا خطابات سے ذرا متاثر نہیں ہوتی ۔ اس کا اینٹینا ایک مختلف خبر ریلے کر رہا ہوتا ہے ۔ اس کی آنکھ میں شک کی ایک آنچ جھلملاتی رہتی ہے ۔ اسے پتہ ہوتا ہے کہ کون بزرگ میلی آنکھ رکھتا ہے اور کون سا جوان پارسا ہے ۔ اسے یہ سب کچھ جاننے کیلئے کسی تگ و دو کی ضرورت نہیں ہوتی ۔ قدرت اسے یہ سروس اسے چوبیس گھنٹہ اور ساتوں دن مفت فراہم کرتی ہے ۔ اس لحاظ سے ہم لوگ یعنی مرد حضرات اپنے آپ کو نرا کور چشم کہہ سکتے ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بہرحال بات ہورہی تھی میری مسیاز کی ۔ ۔ ۔ ۔ میری کا اینٹینا تو تھا بھی بہت تیز ۔اس کا تو پورا وجود ہی کسی چنگاری کے انتظار میں رہتا تھا ۔ ہر وقت کسی آنچ کا منتظر ۔ ادھر آپ کی آنکھ کی چقماق نے جسم کے کسی بھی حصہ کو چھوا اور ادھر وہ دھڑ دھڑ سلگنا شروع ہوجاتا ۔ اس کا پورا وجود ہی ایک پھلجھڑی کی مانند تھا ۔ جہاں بھی آگ مَس ہوتی وہیں سے چنگاریاں پھوٹنے لگتیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ بات غنیمت تھی کہ اس کے اینٹینا نے مجھے نوٹس تو کرلیا تھا پر مسترد نہیں کیا تھا ۔ اصل میں اینٹینا کا کام تو ریلے کردینا ہوتا ہے پھر عورت کے دماغ میں لگا کمپیوٹر اس ڈیٹا کو پوسس کر کے دل کی بارگاہ میں پیش کردیتا ہے اور یہ فیصلہ دل صادر کرتا ہے کہ دیکھنے والی نگاہ قبول قرار پائی یا رد کردی گئی ۔ شاید پہلی نظر میں ہوجانے والی محبت یا پہلی ہی ملاقات میں ہونے والی سخت بیزاری کی وجہ بھی یہی ہو ۔ ۔ ۔ ۔ ۔ ۔ ۔ حد تو یہ ہے کہ کمرے میں بیٹھے پچاس مرد بھی اگر ایک عورت کو تک رہے ہوں تب بھی اس کا دل مسلسل دیکھنے والی شوخ نگاہوں میں سے کچھ کو قبول اور کچھ کو رد کر رہا ہوتا ہے ۔ وہ کچھ لوگوں کو خشمگیں انداز سے گھورتی ہے کہ خبردار اگر مجھے دیکھا اور کچھ لوگوں کی طرف اپنی مسکراہٹ کے پھول پھینک کر انہیں مستِ نظارہ رہنے کی ترغیب دیتی رہتی ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بات ہورہی تھی میری مسیاز کی ۔ ۔ ۔ ۔ ۔ جی اسے مسیاز ہی پڑھئیے گا ۔ مکیاس سے بات نہیں بنتی ۔ ۔۔ ۔۔ اب یوں ہوتا کہ وہ فائلنگ کیبینیٹ پر کھڑی فائلیں چیک کررہی ہوتی اور میں دور سے کھڑا اس کے شفاف بازووٗں کو یا اس کے ڈریس سے جھانکتی گردن کی پشت کو دیکھ رہا ہوتا ۔ اس کا اینٹینا اسے خبر کردیتا ۔وہ تھوڑی دیر کے بعد چہرے کو ہلکا سا موڑ کر ایک اُچٹتی سی نظر مجھ پر ڈالتی اور ہلکے سے مسکرا کر میرے مستِ نظارہ رہنے پر اپنے اظہارِ مسرت کی مہر ثبت کر دیتی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اس کی عمر تیس، بتیس سال کی ہوگی ۔ شوہر سے علیحدگی کے بعد وہ اپنے دو بیٹوں کے ساتھ تنہا رہتی تھی ۔ بچوں کے نام اس کے اچھے ذوق کے غمّاز تھے ۔ ایک نکولس اور دوسرا دانتے ۔۔۔۔۔۔ انفرنو کا شاعر ۔۔۔۔دانتے ۔۔۔۔ ایسا نام رکھنے کیلئے جس ذوقِ سلیم کی ضرورت ہوتی ہے وہ اس میں بدرجہٗ اتم موجود تھا ۔ اس کی شادی چار پانچ سال سے زیادہ نہیں چلی ۔ اصل میں ترقی یافتہ اقوام میں شادیاں زیادہ عرصہ چل بھی نہیں پاتیں ۔ جب مرد و عورت دونوں تعلیم یافتہ ہوں، کمارہے ہوں اور معاشی طور پر ایک دوسرے کے محتاج نہ ہوں اور جنسِ مخالف سے میل ملاقات بھی عام ہو تو ایسے میں لمبی ازدواجی زندگی کا معاملہ کھٹائی میں پڑ ہی جاتا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بات ہورہی تھی میری مسیاز کی ۔ ۔ ۔ ۔مجھے امید ہے کہ آپ اسے مسیاز ہی پڑھ رہے ہوں گے اور بدیسی پھول کی مثال بھی آپ کے ذہن میں ہوگی ۔۔ ۔ ۔ ۔ جی وہ بالکل ایک بدیسی پھول کی مانند تھی ۔ ماں جرمن نژاد امریکی، باپ ہسپانوی ۔ ماں کا رنگ روپ اور باپ کی وجاہت اس کی شخصیت میں یکجا ہوگئے تھے ۔ چمکدار صبیح رنگت، بڑی بڑی روشن آنکھیں، کہیں سے سرخی مائل سیاہ، کہیں سے گہرے سرخ خوبصورت ریشمی بال ۔ بھرا بھرا گداز بدن، دراز مگر گوارا قدو قامت ۔ جہاں سے گزرجاتی لوگ رک کر اسے دیکھنے لگتے ۔ خوش لباس ضرور تھی مگر فیاض نہیں تھی ۔ دفتر کی دوسری عورتوں کی طرح نہ میں نے اسے کبھی شوخ رنگ پہنے دیکھا نہ ہی کھلے لباس اسے پسند تھے ۔ بات چیت بھی بہت ہی کم لوگوں سے کرتی ۔ ہر وقت لئے دئے رہتی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کام کے بعد شام میں کبھی کبھار ہم قریب ہی واقع ایک کلب میں چلے آتے ۔ وہ لائٹ بئیر کی ایک چھوٹی بوتل آرڈر کرتی اور دیر تک اس سے کھیلتی رہتی ۔ اکثر آدھی سے زیادہ بھری بوتل میز پر پڑی رہتی ۔ بچوں کے بڑا ہونے پر میں نے پینا بالکل چھوڑ دیا تھا ۔ میں بد مزہ سی نان الکوحلک بئر آرڈر کرکے اس کا ساتھ دینے کی کوشش کرتا ۔ اس کی آواز بہت رسیلی تھی ، آپ اسے مدھ بھری بھی کہہ سکتے ہیں۔ بہت مدھم لہجہ میں آہستگی سے باتیں کرتی ۔ ہم دنیا جہان کی باتیں کرتے۔ انگریزی اور ہسپانوی ادب میں اس کا مطالعہ خاصہ وسیع تھا ۔ جب میں اسے رخصت کرتا تو اس کے سلگتے اور بھرپور وجود کو اپنی بانہوں میں سمیٹ کر اسے اپنے ساتھ لپٹا بھی لیتا اور اسکی خوبصورت گردن کو چوم بھی لیتا ۔ وہ نہ ہی ناگواری سے کسمساتی نہ ہی سپردگی میں بے حال ہوتی ۔ عجب محتاط رویہ تھا اس کا ۔۔۔۔ 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تھینکس گیونگ پر اس نے مجھے بچوں سے ملوایا ۔ سات آٹھ برس کا نکولس اور چار پانچ سال کا دانتے ۔ بہت ہی خوش وضع اور خوش اطوار ۔ ۔۔۔۔ایسے بچے جنہیں مل کر دل خوش ہوجائے ۔ کرسمس کے ڈنر پر اس کی امی کے گھر میں بطورِ خاص مدعو تھا ۔ آہستہ آہستہ ہم ایک دوسرے کے عادی ہوتے جارہے تھے ۔ آفس میں عموماً وہ مجھ سے بات نہیں کرتی تھی ۔ وہی اس کا محتاط رویہ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک روز کچھ عجیب سی بات ہوئی ۔ اس نے میرے آفس میں آکر کہا کہ کہ وہ بار میں مجھ سے ملنا چاہتی ہے ۔ اس کا یوں آنا مجھے عجیب لگا ۔ اس سے پہلے ہمیشہ یہ فرض میں انجام دیتا آیا تھا ۔ شام میں بار کے ایک مخصوص کونے میں ہم ایک دوسرے کے مقابل بیٹھے تھے ۔ میں نمکین مونگ پھلیاں ٹھونگ رہا تھا ۔ اور وہ کوئی اہم بات کرنے کیلئے اپنے آپ کو گویا آمادہ کر رہی تھی ۔ اور پھر اس کی مدھر آواز نے کانوں میں رس گھولنا شروع کیا ۔ اس نے پہلی بار میرے لئے اپنی پسندیدگی کا اظہار کیا ۔ اس نے بتایا کہ وہ مجھے بہت چاہنے لگی ہے ۔ اس کے بچے بھی مجھے بہت پسند کرتے ہیں ۔ اس نے میری آنکھوں میں جھانکتے ہوئے مجھ سے کہا ۔ ۔ ۔ ۔ ۔فیضی ۔ ۔ ۔ اب اگر تم کوئی فیصلہ کرنا چاہو تو مجھے آمادہ سمجھو ۔ ۔ ۔ ۔ ۔ ۔ ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں گم صم اسے دیکھتا رہا ۔ میں کیا فیصلہ کرتا ۔۔۔۔۔۔۔ ہجر نصیب محبتیں رچانے والے ہم لوگ کوئی فیصلہ کر بھی کیسے سکتے ہیں ۔۔۔۔۔۔۔ میرا بیٹا نیویارک میں پڑھ رہا ہے ۔ میری بیٹی اب کالج جانے والی ہے ۔۔۔۔۔۔۔۔ میری بیوی پچھلے بارہ برس شدید ڈپریشن کا شکار رہ کر اللہ کو پیاری ہوگئی ہے ۔۔۔۔۔۔۔۔۔۔ ۔۔۔ میری محرومیاں ۔۔۔۔میری خواہشیں ۔۔۔۔۔اپنی جگہ ۔ لیکن معاشرہ، مذہب، جوانی کی دہلیز پر قدم رکھتی بیٹی ۔ ۔ ۔ ۔ میں ششدر سا میری مسیاز کی طرف دیکھتا رہا ۔ ۔ ۔ ۔ ۔ ۔ ۔

اس کے اینٹینا نے پیغام دماغ تک پہنچایا ۔ دماغ نے ڈیٹا پروسس کرکے دل کی بارگاہ میں پیش کردیا ۔ ۔ ۔ ۔ ۔ اور تب میں نے دیکھا کہ اس کی آنکھوں میں جگی جوت ایک دم سے بجھ سی گئی ۔ ۔ ۔ ۔اس کی پلکیں ہلکے سے نم ہوئیں اور اس جسم نے سلگنا چھوڑدیا ۔ ۔ ۔ ۔ ۔ سلگتا بھی کیسے ۔۔۔۔۔۔۔ پھلجھڑی اگر بھیگ جائے تو پھر آگ سے مَس ہوکر بھی اس سے چنگاریاں تو نہیں پھوٹتیں ۔ ۔۔۔۔۔۔ اس نے کوئی واویلا نہیں کیا نہ ہی کوئی سوال پوچھا ۔ بس ایک خاموشی اختیار کرلی ۔ ۔ ۔ ۔ ۔ ۔ ۔ ۔کچھ دنوں بعد اس نے مجھے سرسری سا بتایا کہ اسے سٹی لائبریری میں اچھی جاب مل رہی ہے ۔ ۔ ۔ ۔ ۔ ۔میں اس سے یہ بھی نہ پوچھ سکا کہ کس شہر کی لائبریری میں ۔ ۔ ۔ ۔ ۔ لاس اینجلس کے گردو نواح میں ڈیڑھ دو سو کے قریب شہر ہیں ۔۔ ۔ ۔ ۔ میں اس سے یہ بھی نہ پوچھ سکا کہ وہ کس شہر میں منتقل ہورہی ہے ۔ ۔ ۔ ۔میں اس سے کس برتے پر پوچھتا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ ہی دنوں کے بعد میں نے سنا کہ میری مسیاز نے دفتر سے استعفیٰ دے دیا ہے ۔۔۔۔۔ جس سادگی اور آہستگی سے وہ میری زندگی میں داخل ہوئی تھی اسی سادگی اور آہستگی سے اس نے مجھے چھوڑ بھی دیا ۔ ۔ ۔ ۔ ۔ ۔ ۔اب میں ہوں اور میرے پچھتاوے ہیں اور ایک بہت سخت اذیت ۔ ۔ ۔ ۔ ۔ ۔ میں یہ خوب اچھی طرح جانتا ہوں کہ اتنی حسین، ایسی بھرپور، اتنی شائستہ اور مثالی عورت مجھے زندگی میں پھر نہیں ملے گی ۔ ۔ ۔ ۔ ۔ ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں اپنے کمرے میں بیٹھا جانے کب سے کمپیوٹر کی خالی اسکرین کو تک رہا ہوں ۔۔۔۔ میری بیٹی کمرے میں داخل ہوتی ہے ۔۔۔۔پیار سے میرا ماتھا چومتی ہے ہولے سے کہتی ہے ۔۔۔۔شب بخیر ۔۔۔۔۔۔ میں سوچتا ہوں ۔ ۔ ۔ ۔ ۔ ساری زندگی ایک دن کی کہانی ہی تو ہے ۔۔۔۔۔۔ بیوناس دیاز۔۔۔۔ دن بخیر ۔۔۔۔اور شب بخیر ۔۔۔۔۔۔۔۔ زندگی کا دن تو گزرگیا اب رات ہی کا تو انتظار ہے ۔ ۔ ۔ ۔ ۔